လီဗာပူးလ်ကို အကောင်းဆုံးကစားပြီး အနိုင်ယူခဲ့တဲ့ အာဆင်နယ်

လီဗာပူးလ်ကို အကောင်းဆုံးကစားပြီး အနိုင်ယူခဲ့တဲ့ အာဆင်နယ်

--------------------------------- 

အာဆင်နယ် ၃ - ၁ လီဗာပူးလ် 

အာဆင်နယ် ဒီပွဲဘာလို့နိုင်လဲဆိုပြီး မေးခွန်းထုတ်ရင် စိတ်ဓာတ်ကြောင့်ပဲလို့ ဖြေချင်ပါတယ်။ လီဗာပူးလ်အမှားလုပ်တာတွေလည်း တစ်ပိုင်းဆိုပေမယ့် အာဆင်နယ် က ငါတို့ နိုင်ကိုနိုင်မှဖြစ်မယ်ဆိုတဲ့ စိတ်ထားပြီး ကစားသွားခဲ့တာပါ။ ဒီအချက်က ဒီနိုင်ပွဲအတွက် အဓိကပါပဲ။ 

ဒီပွဲမှာ အာဆင်နယ်က အိုဒီဂတ် ၊ မာတင်နယ်လီ ၊ ဒီကလန်ရိုက်စ် တို့ စွမ်းဆောင်ရည်အရမ်းကောင်းပါတယ်။ ဒီကစားသမား (၃)ယောက်ရဲ့အားက လီဗာပူးလ်အသင်းကို ပုံမှန်အောက်ရောက်သွားစေခဲ့တယ်။ လီဗာပူးလ်အသင်းရဲ့ ပထမဆုံးအားနည်းချက်ကတော့ အလုပ်လုံးဝမဖြစ်ခဲ့တဲ့ ဂတ်ပို ၊ ဒီယက်ဇ် ၊ ဂျိုတာ တိုက်စစ်အတွဲပါပဲ။ ကွင်းလယ်မှာလည်း မက်အယ်လစ္စတာ တစ်ယောက်တည်းနဲ့ အာဆင်နယ်ကို ခံကန်နေခဲ့ရတာပါ။ 

ဒီလိုနဲ့ ပွဲချိန်(၁၄)မိနစ်မှာ အာဆင်နယ် ဂိုးစရပါတယ်။ ဒီဂိုးက ဗန်ဒိုက်ရဲ့ မလိုအပ်ပဲ ကွင်းလယ်တစ်ထောက်နေတာကနေ ခံစစ်မှာ ဟာကွက်ကြီးဖြစ်သွားပြီး အိုဒီဂတ် ခင်းပေးတဲ့ဘောလုံးကို ဟာဗက်ဇ် ကန်ချက် ဂိုးသမားပုတ်လို့ ပြန်ထွက်လာတာကို ဆာကာ က အပိုင်ကန်သွင်းယူခဲ့တာပါ။ အာဆင်နယ် ခြေစွမ်းလည်းသာ ဂိုးလည်းသာနေလို့ အေးဆေးမယ်ထင်ပေမယ့် မအေးဆေးခဲ့ပါဘူး။ ပထမပိုင်းပြီးခါနီး ပွဲချိန်(၄၅+၃)မိနစ်မှာ ဆလီဘာ နဲ့ ဂိုးသမား ရာယာ တို့ နားလည်မှုအလွဲကနေ ဂါဘရီယယ်လ် ကိုယ့်ဂိုးကိုယ်သွင်းမိလို့ တစ်ဖက်တစ်ဂိုးစီဖြစ်သွားခဲ့ပါတယ်။ 

ဒုတိယပိုင်းအစမှာ လီဗာပူးလ်ကစားပုံကောင်းလို့ အာဆင်နယ် တော်တော်လေးတောင့်ခံခဲ့ရပါသေးတယ်။ ဒါပေမယ့် ပွဲချိန်(၆၇)မိနစ်မှာ အပြောင်းအလဲစဖြစ်ပါတော့တယ်။ ဒါကတော့ ဗန်ဒိုက် နဲ့ ဂိုးသမားအယ်လီဆန် တို့ရဲ့ အမှားကနေ မာတင်နယ်လီ က လွတ်လွတ်ကျွတ်ကျွတ်ကန်သွင်းခွင့်ရခဲ့ပြီး ဂိုးအဖြစ်ပြောင်းလဲပေးခဲ့တာပါပဲ။ လီဗာပူးလ်ဘက်က ကိုနာတေးလည်း ပွဲချိန်(၈၈)မိနစ်မှာ အထုတ်ခံခဲ့ရတော့ ပွဲက ပြီးသွားခဲ့ပါတော့တယ်။ အာဆင်နယ်အတွက် ပြတ်သားတဲ့ အနိုင်ရလဒ်ကိုတော့ ဂိုးလာဘ်ရှိတဲ့ ထရော့ဆဒ် က ပွဲချိန်(၉၂)မိနစ်မှာ ဆောင်ကျဥ်းပေးခဲ့တာဖြစ်ပြီး ဒီဂိုးမှာလည်း အယ်လီဆန် က ပေါ့ဆလွန်းခဲ့ပါတယ်။ 

အာဆင်နယ်ရဲ့ ဒီနိုင်ပွဲကြောင့် ပရီးမီးယားလိဂ်ကတော့ ပိုစိတ်ဝင်စားဖို့ကောင်းသွားခဲ့ပါပြီ။ လီဗာပူးလ် ၊ အာဆင်နယ် ၊ မန်စီးတီးအသင်းတွေက ပရီးမီးယားလိဂ် ချန်ပီယံဆု မျှော်လင့်ချက်ကိုယ်စီနဲ့ ဖြစ်ကြပါတယ်။