ပရီးမီးယားလိဂ် ဒိုင်ယာရီ (၁၃)

ပရီးမီးယားလိဂ် ဒိုင်ယာရီ (၁၃) " မင်းသားတွေရှိခဲ့တဲ့ရက်သတ္တပတ် "

⚽⚽⚽⚽ 

⚽ နည်းစနစ်ပိုင်း အားပြိုင်တယ်ပြောပြော ၊ ပွဲအတွင်း ဘယ်လိုတွေ အပြောင်းအလဲလုပ်သွားတယ်ပြောပြော မန်စီးတီးအသာကြီးဆိုတာအထင်အရှားကြီးပါ။ လူစားလဲစရာ ၊ အပြောင်းအလဲလုပ်စရာလူမရှိလို့သာ ဖြစ်သွားတဲ့ သရေရလဒ်ပါပဲ။ မန်စီးတီးကတော့ မန်စီးတီးအတိုင်းသွားခဲ့တာပါ။ လီဗာပူးလ်ကတော့ ချန်ပီယံဖြစ်ချင်ရင်အခုထက်ပိုကောင်းဖို့လိုပါတယ်။ 

⚽ အထင်ကြီးတုန်းရှိသေး နယူးကာဆယ်ကို (၄-၁)ဆိုတော့ ချယ်လ်ဆီးက ချယ်လ်ဆီးပါပဲလားလို့ ရေရွတ်မိပြန်တယ်။ မျှော်လင့်ချက်တွေပိုလာတိုင်း အကြိမ်ကြိမ်ရိုက်ချိုးနေတာ ထုံးစံလိုတောင်ဖြစ်လာပြီ။ပွဲစဥ်(၁၃)အပြီး အဆင့်(၁၀)ဖြစ်နေတာကလည်း လွဲမှားမှုတစ်ခုပါပဲ။ချယ်လ်ဆီးကို အရင်လို အဆင့်အတန်းမျိုးမှာပြန်မြင်ချင်ပါတယ်။ 

⚽ မန်စီးတီးနဲ့ လီဗာပူးလ် သရေပွဲမှာ အမြတ်ထုတ်သွားတာက ဆင်ပျံကြီး အာဆင်နယ်။ အခုဆို ဘရန့်ဖို့ဒ်ကိုနိုင်ပြီး အဆင့်(၁)နေရာကိုတက်လှမ်းနိုင်ခဲ့ပြီ။ ဒီလိုမျိုး အဆင့်(၁)နေရာကိုရောက်ဖို့ ဂိုးသွင်းသွားတဲ့သူက ရုန်းကန်နေရတဲ့ ဟာဗက်ဇ် ဆိုတော့ အရာအားလုံးက ဇာတ်ညွန်းဆွဲထားသလိုမျိုးမင်းသားဆိုတာ ပေါ်ရတော့မယ့်အချိန်မှအလိုက်သင့်ပေါ်လာတယ်ဆိုတာမျိုးနဲ့လှလှပပ ဖန်တီးသွားခဲ့တယ်။ 

⚽ ဒဏ်ရာတွေများနေတာ အမှန်ဆိုပေမယ့် ခြေစွမ်းလည်းကျသွားတာကိုလက်ခံရမယ်။ နောက်တစ်ခုက ကံကောင်းမှုပေါ့။ ရာသီအစက ရခဲ့တဲ့ ဒီကံကောင်းမှုကလည်း အခုနောက်ပိုင်းပွဲတွေမှာ ပျောက်ဆုံးသွားတယ်။ ရလဒ်ကောင်းတွေနဲ့တော့ပြန်လာဦးမှာပါ။ ဒါပေမယ့် အချိန်တန်ရင်စပါးက စပါးပါပဲ ဆိုတာကလည်း အတိအကျကို မှန်နေတုန်းပါပဲ။ 

⚽ မန်ယူပွဲအပြီး ဆိုရှယ်မီဒီယာထက်မှာဂါနာချိူ ရဲ့သွင်းဂိုး သတင်းတွေက ဖုံးလွှမ်းလိုက်တယ်။ ရွန်နီ နဲ့ ယှဥ်လိုက်စီရော်နယ်လ်ဒို နဲ့ ယှဥ်လိုက်နဲ့ ကြည်နူးဖို့လည်းကောင်းပါတယ်။ ဂါနာချို ဂိုးသာ စောစောစီးစီးမဖြစ်ခဲ့ရင် မန်ယူအတွက် ဂိုးပြတ်နိုင်ပွဲရဖို့ ခက်ခဲသွားနိုင်တယ်။ ဂါနာချို က အစပြုပေးခဲ့ပြီး ဂါနာချို ကြောင့်အရာအားလုံးလွယ်ကူသွားခဲ့တယ်လို့လည်း ပြောလို့ရတယ်။ ဒီတစ်ပတ်မှာ ဟာဗက်ဇ်အပြီးနောက်ထပ် မင်းသား ကတော့ဂါနာချို ပေါ့။