ချန်ပီယံလောင်း အာဆင်နယ် ဘက်မှာ ကံတရားရှိတယ်

ချန်ပီယံလောင်း အာဆင်နယ် ဘက်မှာ ကံတရားရှိတယ်

----------------------------------------- 

ချယ်လ်ဆီး ၂ - ၂ အာဆင်နယ် 

ငါတို့က ချန်ပီယံလောင်းတွေဆိုပြီး ပြောနေတဲ့ အာဆင်နယ် ကို မင်းလားကွ ချန်ပီယံလောင်းဆိုပြီး ချယ်လ်ဆီး က အပေါ်စီးက ကစားသွားခဲ့တာပါ။ အိမ်ကွင်းမှာ (၂-၀)နဲ့တောင် ဦးဆောင်နိုင်ခဲ့ပေမယ့် ပွဲအပြီးမှာတော့ (၂-၂)ပါ။ ဘာလို့လဲဆိုတော့ ချန်ပီယံလောင်း အာဆင်နယ် ဘက်မှာ ကံတရားရှိနေလို့ပါပဲ။ 

အာဆင်နယ်အသင်းရဲ့ ဒီလိုပွဲကျပ်မှာကစားသွားတဲ့ ကြံခိုင်မှု ၊ မန်စီးတီး ကိုနိုင်အပြီးမှာ ပိုကောင်းတဲ့အသင်းပုံစံဖြစ်ရမယ့်အစား ကျဆင်းသလိုဖြစ်နေတဲ့ အနေအထားတွေက မေးခွန်းထုတ်စရာပါ။ ချယ်လ်ဆီးအသင်းကတော့ ဒီရာသီ အကောင်းဆုံး ပွဲကိုကစားသွားတာဖြစ်ပြီး ကစားအား ၊ ကြိုးစားမှု ၊ စိတ်ဓာတ်ပိုင်း ၊ ကြံခိုင်မှု အရာအားလုံး အာဆင်နယ် ထက်သာခဲ့ပေမယ့် ပေါ့ဆမှုသေးသေးလေးတွေကြောင့် သရေရလဒ်နဲ့သာ ကျေနပ်ခဲ့ရတာဖြစ်ပါတယ်။ 

ချယ်လ်ဆီးအတွက် သွင်းဂိုးတွေကို ပွဲချိန် (၁၅)မိနစ်မှာ ပယ်လ်မာ က ပယ်နယ်တီ ၊ ပွဲချိန် (၄၈)မိနစ်မှာ မူဒရစ် က ရှေ့တက်နေတဲ့ ဂိုးသမား ရာယာ ကိုကျော်ပြီး သွင်းယူခဲ့တာဖြစ်ပါတယ်။ 

အာဆင်နယ်မှာ အိုဒီဂတ် ရုန်းကန်ခဲ့ရလို့ တိုက်စစ်လမ်းကြောင်းမပွင့်ခဲ့သလို မာတင်နယ်လီ နဲ့ ဆာကာ တို့လည်း ကစားရခက်ခဲ့ကြပါတယ်။ ဒီလိုနဲ့ ပွဲချိန်(၇၇)မိနစ်မှာ အာဆင်နယ် မထင်မှတ်ပဲ ချေပဂိုးရခဲ့ပြီး ဒီကလန်ရိုက်စ် က သွင်းပေးခဲ့တာပါ။ 

ချေပဂိုးရအပြီးမှာ ဟာဗက်ဇ် ၊ ထရော့ဆဒ် တို့ကိုထည့်ပြီး အာတီတာ အပြောင်းအလဲလုပ်ခဲ့သလို ဒီအပြောင်းအလဲ ကပဲ အသင်းကို ကယ်တင်ပေးနေကြ ထရော့ဆဒ် က ပွဲချိန်(၈၄)မိနစ်မှာ ဆာကာ ရဲ့ ဖြတ်တင်ဘောကို အလိုက်သင့်ပြေးထွက် ပိတ်သွင်းကာ အာဆင်နယ်အတွက် ဒုတိယချေပဂိုးသွင်းယူပေးခဲ့တာဖြစ်ပါတယ်။ 

ခြေစွမ်းမကောင်းခဲ့ပေမယ့် ရမှတ်မဆုံးရှုံးခဲ့တာက အာဆင်နယ်အတွက် အမြတ်ပါပဲ။ အာဆင်နယ်အသင်းကတော့ နောက်ထပ်ရွှေဖလားမျှော်လင့်ချက်နဲ့ ရှေ့ဆက်နေတုန်းဖြစ်ပါတယ်။