မန်ယူ နဲ့ ချယ်လ်ဆီးအတွက် ကျေနပ်စရာရလဒ်

မန်ယူ ၁ - ၁ ချယ်လ်ဆီး

 

(၂)သင်းလုံးက သရေကိုမျှော်ကစားလာတယ်လို့တောင်ထင်ရပါတယ်။ (၂)သင်းလုံးအတွက် ကျေနပ်စရာရလဒ်လို့လည်းပြောလို့ရသလို မန်ယူအသင်း အခွင့်အရေးတွေဖြုန်းတီးလွန်းလို့ မနိုင်ခဲ့တာလို့လည်း ပြောလို့ရပါတယ်။

 

မန်ယူကတော့ ထုံးစံအတိုင်း ဂါနာချို ၊ ရက်ရှ်ဖို့ဒ် ၊ ဟွိုင်းလွန် ၊ ဖာနန်ဒက်စ် တို့အားနဲ့ပဲ ဂိုးရဖို့ကြိုးစားခဲ့ပေမယ့် ဂါနာချို အမှားများလွန်းနေတာ ၊ ဟွိုင်းလွန် လူကာဖို့လောက်ပဲ လုပ်နေတာကြောင့် တိုက်စစ်က အားရစရာတော့ သိပ်မဟုတ်ခဲ့ပါဘူး။ ဒါပေမယ့် နစ္စတယ်ရွိုင်း လက်ထဲမှာတော့ ဖာနန်ဒက်စ် အရင်လိုခြေပြန်ပေါ်သလို ကစားရတာလည်း ပိုလွတ်လပ်သွားပြီး အသင်းလိုက် ခြုံကြည့်ရင်တော့ ကာလတိုအတွင်း ပုံစံလေးတစ်ခုတော့ တည်ထားနိုင်တဲ့ အခြေအနေမှာရှိနေပါတယ်။ ချယ်လ်ဆီးကတော့ နက်တို ရဲ့ တိုးအား ၊ ပယ်လ်မာ ရဲ့ပါးနပ်မှုတို့ကနေ ဂိုးရအောင် လုပ်လာခဲ့ပေမယ့် ထင်သလောက်တော့မဟုတ်ခဲ့ပါဘူး။ ပထမပိုင်းမှာ (၂)သင်းလုံး တိုင်တစ်ကြိမ်စီထိခဲ့တာတော့ရှိခဲ့ပါတယ်။

 

ဒုတိယပိုင်း မိနစ်(၇၀)မှာတော့ ဟွိုင်းလွန် ကို ဆန်းချက်ဇ် ဆွဲလှဲခဲ့လို့ မန်ယူ ပယ်နယ်တီရခဲ့ပြီး ဖာနန်ဒက်စ်က ကန်သွင်းယူခဲ့ပါတယ်။ မန်ယူရဲ့ အပျော်က သိပ်မခံလိုက်ပဲ ပွဲချိန် (၇၄)မိနစ်မှာ ကိုင်စီဒို က အဝေးကန်ချက်နဲ့ သရေဖြစ်စေခဲ့ပါတယ်။

 

ဒီပွဲမှာ အခွင့်အရေးတွေ ၊ ပြေးလမ်းကြောင်းတွေ ၊ ပေးပို့မှုကောင်းတွေလုပ်နိုင်တဲ့ အနေအထားတွေကို ပိုင်ဆိုင်ခဲ့ပေမယ့် ဂါနာချို ဘာတစ်ခုမှ အသုံးမချနိုင်သလို ဦးနှောက်မသုံးပဲ အားတစ်ခုတည်းနဲ့သာ ဘောလုံးကစားဖို့လုပ်နေခဲ့ပါတယ်။ ဖာနန်ဒက်စ် လည်း ပွဲပြီးခါနီးမှာ အပိုင်ကန်ခွင့်ရတာကို ဘယ်လိုစိတ်ကူးနဲ့ ပြီးပြီးရောကန်လိုက်လည်းဆိုတာကိုလည်း မစဥ်းစားတတ်သလောက်ပါပဲ။ ချယ်လ်ဆီးမှာတော့ ကိုင်စီဒို က အကောင်းဆုံးဖြစ်ခဲ့ပြီး ပွဲကိုထိန်းသွားတဲ့ ကစားသမားဖြစ်သလို တိုက်စစ်ကစားသမားတွေသာ ပုံစံကောင်းပြနိုင်ခဲ့ရင် အခုထက်ပိုသာတဲ့ ရလဒ်မျိုး ရသွားနိုင်ပါတယ်။