ရမှတ်ခွဲယူခဲ့ကြတဲ့ လီဗာပူးလ် နဲ့ မန်စီးတီး

ရမှတ်ခွဲယူခဲ့ကြတဲ့ လီဗာပူးလ် နဲ့ မန်စီးတီး

----------------------------- 

လီဗာပူးလ် ၁ - ၁ မန်စီးတီး 

ဒီပွဲက ရှားပါးပွဲစဥ်တစ်ပွဲပါ။ ဘာလို့လဲဆိုတော့ မန်စီးတီး က သရေရဖို့ ခံကစားခဲ့သွားလို့ပါပဲ။ လီဗာပူးလ်က ပိုကောင်းတဲ့ အသင်းဖြစ်ခဲ့ပါတယ်။ မန်စီးတီး ကတော့ သူတို့ရဲ့အဆင့်အတန်းအရဆို ညံ့ခဲ့တဲ့ပွဲပါပဲ။ 

ဒီပွဲမှာ ပြောင်းပြန်အခြေအနေလေးတွေကိုလည်း မြင်ခဲ့ရပါသေးတယ်။ ဒါကတော့ လီဗာပူးလ် ကစားပုံကတစ်ဆင့်ချင်းသွားခဲ့တာနဲ့ မန်စီးတီး က ဘောလုံးရတာနဲ့ တိုက်စစ်ကို တိုက်ရိုက်စတင်တာတွေပါ။ ပွဲကြီးတွေမှာ ဟာလန်း မတိုးဘူးဆိုတာကို ထပ်မြင်တွေ့ရတဲ့ ပွဲဖြစ်​ပြီး သူ့ကိုမပံ့ပိုးပေးနိုင်ရင် သူလည်း ဘာမှမလုပ်နိုင်ပါဘူး။ 

ဦးဆောင်ဂိုးကို မန်စီးတီး စရခဲ့တာဖြစ်ပြီး ပွဲချိန်(၂၃)မိနစ်မှာ ဒီဘရိုင်းနား ရဲ့ ထောင့်ကန်ဘောကနေ ဂျွန်စတုန်းစ် က သွင်းယူခဲ့တာပါ။ ထောင့်ကန်ဘောလို အနေအထားမျိုးမှာ ပြိုင်ဘက်ခံစစ်ကစားသမားတစ်ဦးကို လုံးလုံးကြီးလွှတ်ထားတဲ့ လီဗာပူးလ်အသင်း အမှားကြောင့် ပေးဆပ်လိုက်ရတာဖြစ်ပါတယ်။ 

ဒုတိယပိုင်းအစမှာပဲ လီဗာပူးလ် ပယ်နယ်တီရခဲ့ပြီး ဂိုးသမား အီဒါဆန် က နူနက်ဇ် ကိုတားဆီးပုံကြမ်းခဲ့လို့ရခဲ့တာပါ။ ဒီပယ်နယ်တီကို ပွဲချိန်မိနစ် (၅၀)မှာ မက်အယ်လစ္စတာ က အမှားအယွင်းမရှိ ကန်သွင်းပြီး ချေပဂိုးအဖြစ်ပြောင်းလဲပေးခဲ့ပါတယ်။ ပွဲချိန်မိနစ် (၆၀)နောက်ပိုင်းမှာတော့ ပွဲကို လီဗာပူးလ်က စိုးမိုးသွားခဲ့ပြီး မန်စီးတီးကွင်းလယ်လုံးဝကို ပျက်သွားပါတော့တယ်။ 

ဒီယက်ဇ် ကစားတာ ကောင်းပေမယ့် အပိုင်အခွင့်အရေးတွေ ဖြုန်းခဲ့လို့ လီဗာပူးလ် နစ်နာခဲ့ရပါတယ်။ လီဗာပူးလ် ဘက်က ဆာလာ ၊ ရော်ဘတ်ဆန် တို့ကိုထည့်ပြီး တိုက်စစ်မြင့်ခဲ့သလို မန်စီးတီးကလည်း ပွဲထိန်းဖို့ ကိုဗာချစ်ကိုထည့်ခဲ့ပါတယ်။ ပွဲပြီးခါနီး ဒိုကူရဲ့ ကန်ချက်တိုင်ထိခဲ့တာနဲ့ ဒိုကူ မက်အယ်လစ္စတာ ကို ကန်ခဲ့တာတွေက လွဲရင် ကျန်တဲ့အချိန်တွေကတော့ ကြည့်နေရင်းနဲ့ပဲ သရေကျတော့မယ်ဆိုတာကို သိနေခဲ့ရတဲ့ ပွဲမျိုးဖြစ်ပါတယ်။