ချယ်လ်ဆီးကို ဂိုးပြတ်အနိုင်ယူခဲ့တဲ့ လီဗာပူးလ်

ချယ်လ်ဆီးကို ဂိုးပြတ်အနိုင်ယူခဲ့တဲ့ လီဗာပူးလ်

----------------------------- 

လီဗာပူးလ် ၄ - ၁ ချယ်လ်ဆီး 

လီဗာပူးလ်နဲ့ ချယ်လ်ဆီးတို့ရဲ့ သရေပွဲတွေက ဒီတစ်ခါမှာတော့ လီဗာပူးလ်အသင်းရဲ့ ဂိုးပြတ်ရလဒ်နဲ့အတူ ပြီးဆုံးသွားခဲ့ပါပြီ။ လူမစုံတဲ့ လီဗာပူးလ်ကို ချယ်လ်ဆီးအသင်း ခက်ခဲအောင် ဘာမှမလုပ်နိုင်ခဲ့ပါဘူး။ လီဗာပူးလ်ဘက်ကတစ်သင်းလုံးကောင်းပြီး ချယ်လ်ဆီးဘက်က တစ်သင်းလုံး လိုအပ်ချက်များခဲ့တဲ့ ပွဲမျိုးလည်းဖြစ်ပါတယ်။ ပွဲချိန် (၁၀)မိနစ်နောက်ပိုင်းမှာတော့ ပွဲကို လီဗာပူးလ်ကသာ လိုသလိုပုံသွင်းသွားခဲ့ပြီး ချယ်လ်ဆီးက လီဗာပူးလ်နောက်ကနေ လိုက်မျောနေခဲ့ရတာပါ။ ဂျိုတာ ၊ ဒီယက်ဇ် ၊ နူနက်ဇ် တို့ (၃)ဦးရဲ့ တိုက်စစ်မှာ ရွှေ့လျားကစားနေတဲ့ ပုံကိုလည်း ချယ်လ်ဆီးခံစစ်က ဘယ်လိုမှမတားဆီးနိုင်တော့ ဂိုးတွေပေးခဲ့ရတာကလည်း ဘာမှမဆန်းပါဘူး။ 

ပထမပိုင်းမှာတင် ပွဲချိန်(၂၃) ၊ (၃၉)မိနစ်တွေက ဂျိုတာ ၊ ဘရက်ဒလေ တို့ရဲ့ သွင်းဂိုးတွေနဲ့ (၂)ဂိုးပြတ်ဦးဆောင်ထားလို့ ပွဲက လီဗာပူးလ်အတွက် သက်တောင့်သက်သာပါပဲ။ ချယ်လ်ဆီးကတော့ ဂိုးရဖို့ မြန်နှုန်းမြင့်ပြီး အတင်းဇွတ်တိုးနေတာတွေကလည်း အလုပ်မဖြစ်ခဲ့ပါဘူး။ အန်ဇိုဖာနန်ဒက်ဇ် နဲ့ ကိုင်စီဒို ကွင်းလယ်ကလည်း ငွေကြေးများစွာသုံးထားခဲ့ရပေမယ့် ထိပ်တန်းအဆင့်ဖြစ်လာဖို့ထက် အားနည်းချက်တွေကသာ အပြည့်ဖြစ်နေတာကြောင့် ဝေဖန်ချင်စရာတော်တော်ကောင်းနေပါပြီ။ 

ပွဲချိန် (၆၅)မိနစ်မှာ ဆိုဘိုဆလိုင် ရဲ့ တတိယ ခေါင်းတိုက်ဂိုး ၊ ပွဲချိန် (၇၉)မိနစ်မှာ နူနက်ဇ် ဖန်တီးမှုကနေ ဒီယက်ဇ် က စတုတ္ထဂိုး လီဗာပူးလ်အတွက်သွင်းယူပေးခဲ့ကြပါတယ်။ နူနက်ဇ် ရဲ့ ပယ်နယ်တီလွဲချော်မှု ၊ ဘားတန်းတွေ တိုင်တွေနဲ့ မိတ်ဆက်မှုတွေကြောင့်သာ လီဗာပူးလ် အခုထက်ပိုပြီး ဂိုးမရခဲ့တာပါ။ ချယ်လ်ဆီးအသင်းအတွက် ချေပဂိုးကိုတော့ ပွဲချိန် (၇၁)မိနစ်မှာ အန်ကွန်ကူ က သွင်းယူခဲ့တာဖြစ်ပါတယ်။