ချယ်လ်ဆီးကို အနိုင်ယူပြီး ဖိအားတွေလျှော့ချခဲ့တဲ့ မန်ယူ

ချယ်လ်ဆီးကို အနိုင်ယူပြီး ဖိအားတွေလျှော့ချခဲ့တဲ့ မန်ယူ

-------------------------- 

မန်ယူ ၂ - ၁ ချယ်လ်ဆီး 

ဖိအားတွေများနေတဲ့ အချိန်မှာ မန်ယူအသင်းကတော့ ချယ်လ်ဆီးကို အနိုင်ယူပြီး ဖိအားတွေလျှော့ချနိုင်ခဲ့ပါတယ်။ အခက်အခဲတွေ ကြုံလာတိုင်း ၊ တစ်ခုခုလုပ်ပြဖို့လိုလာတိုင်း ရလဒ်ကောင်းကို အမြဲတမ်းရှာဖွေနိုင်တာကတော့ မန်ယူအသင်းရဲ့ ထုံးစံလို့တောင် ပြောရပါလိမ့်မယ်။ ဒီနိုင်ပွဲအတွက် အရေးပါတဲ့ အချက်ကတော့ တန်ဟက် ရဲ့ အမ်မရာဘတ် ကို ကွင်းလယ်မှာ ပွဲထုတ်လာတဲ့ အခြေအနေလို့မြင်ပြီး သူ့ကြောင့်ကွင်းလယ်က ပိုတည်ငြိမ်မှုရှိခဲ့ပါတယ်။ 

နိုင်ပွဲလိုအပ်နေတဲ့ မန်ယူအသင်းကတော့ ပွဲစတာနဲ့ ချယ်လ်ဆီးကို ဆက်တိုက် ဆိုသလို တိုက်စစ်ဆင်ကစားခဲ့တာပါ။ ဂိုးကန်သွင်းခွင့်တွေ ၊ အခွင့်အရေးတွေရခဲ့ပြီး ပွဲချိန်(၉)မိနစ်မှာတင် ပယ်နယ်တီရခဲ့ပေမယ့် ဖာနန်ဒက်စ် ကန်ချက်ဂိုးမဝင်ခဲ့သလို ဂိုးသမားဆန်းချက်ဇ် ကို မကျော်နိုင်ခဲ့ကြပါဘူး။ ညာတောင်ပံမှာ အန်တိုနီ ပုံမှန်ခြေစွမ်းပြန်ရလာတာကလည်း မန်ယူတိုက်စစ်ကို ပိုကောင်းစေခဲ့ပြီး ပွဲချိန်(၁၉)မိနစ်မှာတော့ ဦးဆောင်ဂိုးစရခဲ့ပါတယ်။ ဒီဂိုးကိုတော့ တွမ်မီနေး က တိုက်စစ်ဆင်ရင်းရလာတဲ့ အခွင့်အရေးကို ကြုံသလိုကန်သွင်းယူခဲ့တာ ဖြစ်ပါတယ်။ ချယ်လ်ဆီးအသင်းလည်း ချေပဂိုးရဖို့ကြိုးစားခဲ့ပေမယ့် မန်ယူအသင်းရဲ့ ပုံမှန်ထက်ပိုတဲ့ ကြိုးစားအားထုတ်မှုတွေကြောင့် ခက်ခဲနေခဲ့ပါတယ်။ ဒီလိုနဲ့ ပွဲချိန် (၄၅)မိနစ်မှာ ချယ်လ်ဆီး ချေပဂိုးပြန်ရပြီး ပယ်လ်မာ က တစ်ကိုယ်တော်အစွမ်းနဲ့သွင်းယူခဲ့တာဖြစ်သလို လင်ဒီလော့ဖ် နဲ့ မက်ဂွိုင်းယား တို့ကာထားတဲ့ကြားကနေ ရအောင် ပညာသားပါပါနဲ့ကန်သွင်းယူခဲ့တာပါ။ 

ဒုတိယပိုင်းမှာတော့ တန်ဟက် က လုခ်ရှော ကို ဗဟိုခံစစ်နေရာထားကစားခဲ့ပြီး ဘယ်နောက်ခံလူနေရာမှာ ရီဂွယ်လွန် ကိုထည့်သုံးခဲ့ပါတယ်။ ဒီအနေအထားက အလုပ်ဖြစ်ခဲ့သလို ဂါနာချို ကစားရပိုချောင်လာခဲ့ပြီး သူ့ကြောင့် ချယ်လ်ဆီးခံစစ် အလုပ်များခဲ့ရပါတယ်။ ပွဲချိန်(၆၉)မိနစ်မှာတော့ မန်ယူအသင်း အနိုင်ဂိုးရခဲ့ပြီး ဂါနာချို ရဲ့ဖြတ်တင်ပေးပို့မှုကို တွမ်မီနေး က ပြေးဝင်ခေါင်းတိုက်သွင်းယူခဲ့တာ ဖြစ်ပါတယ်။မန်ယူအသင်းကတော့ ဒီပွဲမှာ ထိုက်ထိုက်တန်တန်နဲ့ အနိုင်ရရှိခဲ့တာပါ။ ဒီပွဲရဲ့ခြေစွမ်းက မနှစ်ကပုံစံကောင်းမိနေတဲ့ အချိန်က ခြေစွမ်းမျိုးလို့တောင် ပြောလို့ရပါတယ်။ ဒီအနေအထားကိုဆက်ထိန်းထားဖို့လိုပြီး စည်းလုံးမှုပြိုကွဲနေတယ်ဆိုတဲ့ သတင်းတွေဟာ မှားကြောင်းကို ကွင်းအတွင်းမှာပဲနိုင်ပွဲနဲ့ ပြသခဲ့ပါတယ်။