ပရီးမီးယားလိဂ် ဒိုင်ယာရီ (၉)

ပရီးမီးယားလိဂ် ဒိုင်ယာရီ (၉)

" လမ်းကြောင်းမှန်ပေါ် ရောက်ခဲ့ကြတဲ့ရက်သတ္တပတ် " 

⚽⚽⚽⚽ 

ဒီတစ်ပတ်မှာ မန်စီးတီး ၊ လီဗာပူးလ်တို့ နိုင်ပွဲ ပြန်ရခဲ့သလို မန်ယူ ပရီးမီးယားလိဂ် (၂)ပွဲဆက် ပထမဆုံးအကြိမ်ဒီရာသီမှာနိုင်ခဲ့ပါတယ်။ ချယ်လ်​ဆီးနဲ့အာဆင်နယ် တို့ရဲ့သရေပွဲက မျှတခဲ့ပြီးအသင်းတိုင်းလိုလို ဒီတစ်ပတ်အပြီးမှာလမ်းကြောင်းတစ်ခုပေါ်ပြန်တက်နိုင်ခဲ့ကြတာကြောင့် လမ်းကြောင်းမှန်ပေါ် ရောက်ခဲ့ကြတဲ့ရက်သတ္တပတ် လို့ခေါင်းစဥ် ပေးလိုက်ရပါတယ်။ 

⚽ အနီကတ်တစ်ကတ် ၊ ပယ်နယ်တီ တစ်လုံးမှာ ကိုယ့်ဆရာတွေပြန်မကန်ချင်ကြတော့ပါလား ဆိုပြီး ခပ်နောက်နောက်စ လိုက်ချင်တယ်။ဒါဟာ ဘောလုံးဖြစ်တယ်။ ဒီနေ့ ကံဆိုးရင် နောက်နေ့ ကံကောင်းမှာပဲ ဆိုတာကိုနားလည်ထားဖို့လိုပါလိမ့်မယ်။ဘောလုံးလောက က ဒီလိုနဲ့လည်ပတ်နေတာ။ အမြဲတမ်းတော့ ကံဆိုးမနေပါဘူး။ အငြင်းပွားစရာလေးတွေရှိနေမှဘောလုံးပွဲတွေက အရသာရှိနေမှာမဟုတ်လား။ 

⚽ ရိုဒရီ ပါလာတာနဲ့ နိုင်ပွဲဆိုတဲ့ ဇာတ်လမ်းကို ရေးဖွဲ့လိုက်ကြတာပေါ့။ ဘောလုံးအသင်းဟာ ကစားသမားတစ်ယောက်ကြောင့် ဖြစ်တည်နေတာမျိုးမဟုတ်ပေမယ့် ကစားသမားတစ်ယောက်က အသင်းရဲ့အနေအထားကို ပြောင်းလဲပေးနိုင်ပါတယ်။ ရိုဒရီ မပါရင် ရုန်းကန်ရတယ်။ ပါရင် နိုင်တယ်ဆိုတဲ့ တခြားတစ်ဖက်မှာ အဖြေရှာရမှာက ရေရှည်မှာ ဒီအတိုင်းဆက်သွားလို့ မရတော့ဘူးဆိုတဲ့ မေးခွန်းကိုပါပဲ။ 

⚽ မူဒရစ် ဂိုးက ဂိုးသမားတက်နေလို့ကန်လိုက်တာဆိုတာကို လက်မခံနိုင်ကြသလို အာဆင်နယ် ဘက်မှာ ကံတရားရှိခဲ့တယ်ဆိုတာကိုလည်း လက်မခံကြပါဘူး။ ကိုယ်အားပေးတဲ့ အသင်းကို စကားလုံးအစ အကြောမခံနိုင်တဲ့ အားပေးသူတွေရှိနေလို့ ဘောလုံးလောက က မြိုင်ဆိုင်နေတယ်လို့ ဆိုချင်ပါတယ်။ ဘယ်လိုပဲဖြစ်ဖြစ် (၂)လုံးအတွက်တော့ ရလဒ်ကောင်းတစ်ခု ဖြစ်ခဲ့တာပါပဲ။ အာဆင်နယ်ဒီရာသီမှာ တစ်ခုခုဖြစ်နိုင်တယ်ဆိုတာမျိုးကိုလည်း ခံစားရပါတယ်။ 

⚽ အကောင်းဆုံး မဖြစ်ခဲ့ပေမယ့် လိုအပ်တဲ့ နိုင်ပွဲကိုတော့ ပုံဖော်ခဲ့ကြပါတယ်။ (၂)ပွဲဆက် ပရီးမီးယားလိဂ်အနိုင်နဲ့ တည်ငြိမ်မှုတစ်ခု ရှိသွားပြီလို့ မြင်မိတယ်။ ဘရန့်ဖို့ဒ်နဲ့ ရှက်ဖီးလ် ဆိုပေမယ့် အခက်အခဲမျိုးစုံ ဖြစ်နေတဲ့ အသင်းအတွက်တော့ ချိုမြိန်ပါတယ်။ အသင်းကြီးဆန်ဆန် ဂိုးပြတ်နိုင်ပွဲတွေလိုအပ်နေသေးတာ အမှန်ပါပဲ။ ဒါလော့ ရဲ့ သွင်းဂိုးကတော့ အဆင့်အတန်းမြင့်ခဲ့ပါတယ်။